Wir Albrecht, von gotes gnaden furste von Anhalt vnde Greue zu Asschanien, vnde wir Rudolf der junge, von derselben Gnaden Hertzoge zu Sachsen, bekennen vnde bezugen offenbar in dessen briue, waz wir ghelobet haben vnd lobn Bussen Mylowen, Ebele und Heynemanne von Nykammer al der kost abe zu nemene, die sie tragen von vnser wegen vf deme nügen huse zu Butzow, daz sie in haben von unser wegen zu getruwer hant, vnde al des ghewins, den sie tun von vnser wegen, den sie redeliche bewiesen mogen, daz wolle wir en ouch abe nehmen.
Were ouch daz sie buweten, vnde daz vorgenante nuwe hus zu Buzow vesteten, der kost vnde al des ghewins wolle wir on abenemen, er wir daz vorbenante nuwe hus zu Buzow von on brengen. Dor zu lose wir en disse dorfere: nygendorf, hermanstorp, berchholtz, vnde Buchow. Der dörfer sullen sie redeliche ghenisen, alse sie meyste mogen, die wyle daz sie daz vorgenante nuwe hus zu buzow in haben vns zu dinste. Tzu eime orkunde disser dinge habe wir dissen brief gebn zu kopenick, vorsegelt mit vnsen insegele, na gotes ghebort Dryten hundert jar, in deme nuen vnd virtzichsten jare, an sente Johansens abende, des heyligen Thoyfers vnses liben heren Jhesu cristi.
Chronik Pfarrer Bona's (um 1714) - Teil Hohen Neuendorf
